2010.07.16

Jadymy

Świat wartko sie krynci.

Pod wiela sóm chynci,

Jadymy!

Pod wiela nóm chce sie.

Co jutro prziniesie?

Nie wiymy!

Choć robisz za trzech.

Jo ostrzegoł żech

cie chłopie:

Nie starej sie, życi

same ci do rzici

nakopie.

Tóz ruszej przed siebie,

o wodzie i chlebie.

Do przodu!

Trza przeżyć przigoda.

Przespać życi szkoda,

za młodu.

Na głowie włos siwy,

i trochaś już krziwy?

Dyć szalej.

W auto wsodź rodzinka,

kup se piwka krzinka

i wcale

Nie chodź do aptyki,

odstow wszystki lyko,

dochtora.

Posłóchać chciyj mie,

że to jeszcze nie

ta pora!

Na starość o kryczce,

za piecym na ryczce

spóminosz,

O tych downych latach,

ale czasu na to

już ni mosz.

Pod wiela dosz rady,

trzimej sie zasady:

Jadymy!

Fojerman