2007.11.30

Sny nie realne

Siedza se nad rzykóm i zaglóndóm w woda,

widza młode rybki, po dnie chodzóm raki,

serce sie raduje, piykny obroz taki.

I yno zgodnyć tego niy moga...



I tak se sóm siebie zadowóm pytani:

czy to mi sie śni, czy kedyś nastanie?



Lubia se tak siedzieć we ciyniu pod lasym.

I tak se zaglóndóm: czy to dziwne niy ma,

że sie nie kurzi z grubskigo kumina?

A koło na szybie obraco sie czasym....



I tak se sóm siebie zadowóm pytani:

czy to mi sie śni, czy kedyś nastanie?



Ida se na szpacyr, tak, bez jedna wieś,

chałupy sóm proste, nie popynkane,

wszyndzi je czysto, pozamiatane.

Aże sie żyć w takij wsi chce...



I tak se sóm siebie zadowóm pytani:

czy to mi sie śni, czy kedyś nastanie?



Ida se na szpacyr, ludzie mie witajóm,

wszyscy dlo siebie sie uśmiychajóm,

przi płocie stojóm, czas na to majóm.

Wszyscy po ślónsku godajóm...



I tak se sóm siebie zadowóm pytani:

czy to mi sie śni, czy kedyś nastanie.



Och, jak fajniste sóm te nasze sny,

bo tam sie miyszo prowda z marzyniami,

uciecha sie chyto pełnymi gościami.

I tak se yno myśla czy...



I tak se sóm siebie zadowóm pytani:

wiela wert sóm sny, jak sie rano stanie?


Fojerman