2007.08.25

Szumióm brzózki

Szumióm brzózki, szumióm sosny,

żywot wiedóm tu spokojny,

opowiedzieć by nóm chciały

o powstaniach, latach wojny.



Bez te lata, zimy, wiosny,

bez te ciynżki, groźne czasy,

co schróniyni óne niósły,

dlo powstańców, ojców naszych.



Tóż posłóchać chciyj wyndrowcze,

o historji, o tragediach,

pochyl głowa nad mogiłóm,

w lesie znojdziesz tu niejedna.



Tu, w tym miejscu, leży żółnierz,

niech mu lekkóm bydzie ziymia,

tu ciyrpiynio znodli kóniec

ludzie z lagru, z Oświyncimia.



Czasym stróm, polana, łónka,

skryto kajś w pojstrzodku, w lesie,

wiyncyj niż nie jedna ksiónżka

wspómniyń, z lot miniónych, niesie.


Fojerman