2007.06.23

Velorex

We szopie żech znaloz te cudo,

a było to przed wielu laty,

na fórze żech prziwióz go du dóm,

stargane mioł wszystki te szmaty.



Choć nieroz sie potym zdarziło,

żech cis go bez poła Rybnika,

aż z zoli sie za mnóm kurziło,

na jego pónkcie móm bzika.



Velorex na miano mu było.

Jak jo nim wyjyżdżoł z garażu,

to nieroz sie tyż tak zdarzyło,

że silnik mu zdychoł od razu,



a

czasym żech rzykoł ze strachu,

jak mi sie straciyła ta bryndza.

Cadilac tyn moj je bez dachu

i jo se szterdziestkóm tak pyndza.



Bez cołki tydziyń go słodóm,

w niedziela przed frelkóm szpanuja,

a potym przicisna go do dóm

i zaś go bez tydziyń sprawuja.



A jak go odpola i ruszy,

to śmieje mi sie fest gymba,

watóm zatkane móm uszy,

kopruchów zaś pełno w zynbach.



Tóż

Velorex wycióngóm z garażu,

i wciskóm tak gaz do dechy,

aż piszczy fest na wirażu,

a wiela móm przi tym uciechy.


Fojerman