2008.01.29

Fojerman - sportowiec

Taki teraz mómy czasy,

Że trza sztyjc za kasóm dziczyć.

Jak niy mosz człowieku kasy,

Żodyn z tobóm sie niy liczy.



Ale niy wiym, czy o tym wiycie:

Sportowiec niy robi wcale,

A mo rynta na całe życi.

Styknie przijechać z medalym.



Tóż, jo Wóm sie dzisiej prziznóm,

Że tyż na igrzyska jada.

Podjón żech tako decyzjo,

Że chca wygrać olimpiada.



Musza yno se poszukać

Jako fajno dyscyplina.

Możno byda szczyłoł z łuku?

Ale jak sie przi tym mina?



Przeca rynka mi fest tyro,

Niy mom czucio w niyj za tela.

Afera bydzie dziepiyro,

Jak kerego tam uszczela.



Nó, to lepszy zagróm w kosza!

Chyca bal i pod kosz przida.

Przeca nie trza wcale skokać.

Dyć jo kosza niy dowidza!



Toż nic z tego zaś niy bydzie,

Musza dali szukać chyba.

Możno pływak zy mie bydzie?

Dyć zaś niy poradza pływać!



Gimnastyka mi została!

Toż spróbuja zrobić szpagat.

Rozcióngna sie trocha. Aaaała!

Zaroz zy mie bydzie....baba.



Już mie coś pomału biere,

Bo nic niy poradza wybrać,

Tóż niech mi to powiy kery:

Jak móm olimpiada wygrać?



Chyba trza poczekać jeszcze,

Aż wymyśli kto zawody,

Wtedy zajmna piyrsze miejsce.

Piyrsze miejsce w lociu wody.



Fojerman