2009.05.08

Szkoła

W pyndziałek stanół Franek wesoły,

że dzisiej może zaś iś do szkoły,

bo ón już chodzi do piyrszej klasy,

hefty a ksiónżki mo w pukeltaszy.

Dzisiej ślabikorz ze sobóm biere,

bydzie sie uczół ślónskich literek.

Jutro, we wtorek majóm prziroda,

pójdóm do lasa, abo nad woda.

Rachunki majóm w szkole we strzoda,

uczóm sie dzielić, mnożyć, dodować.

We sztwortek Franek mo gimnastyka,

nie trza go prosić, że mo oblykać

bluza, galotki, trampki wygodne,

bo dzisiej bydóm grać we dwa ognie.

Dyć bół dopiyro tydnia poczóntek,

a już zaś kóniec, bo już je pióntek,

z całego tydnia bydzie powtórka,

klasówka zrobi dziecióm rechtorka.

Jutro, sobota, zaś bydzie fraj,

bydzie móg lotać se bele kaj,

popuszczać drachy, skokać po strómach.

W niedziela wiyncy trza siedzieć w dóma,

zrobić zadani, iś do kościoła.

Potym od nowa zaś czeko szkoła...

Fojerman