2008.12.19

Klupanie

Szopa bez dźwiyrzi a okiyn,

W pojstrzodku Józef z Marijóm,

W starym żłóbku, we sianie,

Dziecióntko przed zimnym kryjóm.



Stary chlywik przi familoku,

Bez wody, sztrómu, wónglo,

Bezdómny leży samotny,

Ze swojim psym na szeslóngu.



Izba z kratami w oknie,

W pojstrzodku ośmiu chłopa,

Ale kożdy samotnie

Przeżywo swoja utropa.



Szpitalne łóżko biołe,

A na nim choro matka.

Przi łóżku prózny stołek.

A możno to je sómsiadka?



Przi stole z familijóm,

Opłatek, serwet na sianie,

Prózny talyrz - Wilijo.

Czy słyszysz te klupanie?


Fojerman