2005.07.28.

Kónto

Zefek mo kónto w jednym banku,

a na tym kóncie mo manko.

Godali mu: weź se debet,

bydziesz móg jeś szynka z chlebym.



My ci dómy dużo kasy,

możesz jechać kajś na wczasy.

Autohausów jest od huku,

niy kómbinuj, auto kupuj.



Ale prziszło tyż do spłaty,

Zefek chodzi bez wypłaty,

na obiod jodo brótzupa

i mo wszyndzi dłógów kupa.



Dziecka obtargane chodzóm,

bo odetli mu prónd z wodóm.

Zefek cicho siedzi w kóncie

i spłaco debet na kóncie.



Pado Zefek: za nic w świecie

niy chca słyszeć o debecie.

Nic ci niy dajóm za darmo,

potym w dóma yno larmo.



Baba godo: stary, gupi,

myśloł, że se auto kupi.

Teraz jeździsz ty na kole,

w dóma siedzisz, jak w stodole.



Śniło ci sie być bogaty,

teraz spłacosz yno raty.

Kto w życiu liczy na czyje,

tyn w biydzie dycko żyje.

Fojerman