2007.07.08
Ja, czy niy
Leja, leja woda,
óna se tak płynie,
a mie jest fest szkoda,
że mój świat kajś ginie.
Trocha mi je szkoda,
tóż chca głośno godać
i Was wszystkich pytóm sie:
chcecie tego - ja, czy niy?
Pytóm sie Was dzisiej,
kaj sie tyn świat toczy,
naprzód leci życie,
Ślónsk sie traci z oczy.
Jak zapómnióm ludzie,
Ślónsk na hasiok pudzie,
tóż Was wszystkich pytóm sie:
chcecie tego - ja, czy niy?
Młody niy zno gwary,
ojców naszych starych,
bo to je przeżytek,
gańba i zabytek.
Niech kożdy przemyśli,
jaki znojść tu wyjści,
czy ktoś Ślónsk pogrzebać chce.
Chcecie tego - ja, czy niy?
Niy czas lamyntować
i narzykać wiyncyj,
czas Ślónsk odbudować,
z naszych lot młodziyńczych.
Podwińcie rynkowy,
uczcie młodych mowy,
by dogodac mógli sie,
chcecie tego - ja, czy niy?
W naszych rynkach leży,
prziszłość naszych dzieci,
trza yno uwierzyć,
bo czas wartko leci.
Ślónsk może być wielki,
karlusy i frelki.
Dożyjymy tego my?
Jo by tego chcioł - a Wy?
Fojerman
|