Tak se myśla, czego brakuje tej naszej ślónskij godce, żeby mógła być bardziyj znano, używano i dociyniano? Na pewno przidało by sie uznani od polskigo państwa, uczydła, rechtory, ksiónżki, zasady pisanio, ogólnie pinióndze. Ale z drugij stróny nic nie dajóm żodne ustawy, jynzyki, pinióndze, jak my sami, Ślónzoki, nie zacznymy tej godki szanować. Pod wiela nie zrozumiymy, że to je nasz „skarb narodowy”, erbizna po naszych starzikach, kero trza szanować i sie ó nia starać kożdymu z nas. Przeca nasze starziki nie chodziły do kabaretów, nie słóchały disco polo, óni tej godki używali na kożdy dziyń. Godka ta mo swoji zasady, gramatyka, trza to yno poznać i stosować, a nie godać”bele sie dogodómy”, abo „ni ma kodyfikacyje, tóż wszystko wolno”. Pod wiela bydymy ta godka traktować, jak coś śmiysznego, co sie nadowo yno do wiców, kabaretu, a do disco polo, pod wiela symbolym ślónskij godki bydóm Bercik, Masztalski, Rak, to nic nie pómoże. To tyż je wazne, ale ni może to być wzór ślónskij godki, abo kultury. Przeca godani ni musi być powodym do gańby, ani symbolym zacofanio. Trza sie uczyć, znać jynzyki, ale trza tyż znać swoja godka i być tymu hernym. To my sami muszymy zmiynić nasza myntalność i chcieć szanować ta godka, bo przez to zacznymy szanować samych siebie i dopiyro wtedy mogymy wymogać tego od inkszych. Pod wiela sie to nie stanie, to bydymy yno takimi „paciulokami”, co sie poradzóm yno śmioć z tych wihajstrów, łónaczynio i klapsznitów, a nic wiyncyj.
PS. Słowo "paciulok" wygrało plebiscyt, zrychtowany od "DZ" na "najśmieszniejsze śląskie słowo"
.png)