Stanisław Neblik - Fojerman Godej, czytej a pisz po ślonsku
 
Ô mie
Piyrszo strona
Napisz do mie - kontakt 
Linki
Fraszki a powiedzynia
Velorex
Radzijów, Rybnik
Fraszki a powiedzynia II
Fraszki a powiedzynia III
Opowiadania
Fraszki a powiedzynia IV
Tłōmaczynia
Fraszki a ppwiedzynia V
Zwyrtki
Szpacyjka
Dlo dziecek
Tłōmaczynia II
Zwyrtki II
Dlo dziecek II
Zwyrtki III
O Tigrze we fligrze
Dlo dziecek III
Slónsk downiyj
Slónsk dzisiej
Ślónsk dzisiej II
Limeryki
Śpiywki ślónski
Limeryki II
Prziroda
Limeryki III
Ślabiczka
Wiersze roztomańte
Limeryki IV
Ślabiczka II
Wiersze roztomańte II
Limeryki V
Wiersze roztomańte III
O Fojermanie
O kocie w samolocie
Po polsku - dla dzieci
Po polsku - różne
Po polsku - dla dzieci II
Po polsku - dla dzieci III
Po polsku - różne II
To już było (archiwum)
Podziel sie sobom
Bruksela
Kiczka
Strasburg 2019
Gōrnoślōnsko Tragedyjo
Grabowina, moji gniozdo
Inksi ô nas
 


Licznik

o2u.pl - darmowe liczniki

Ksiónżka gości

 

Nowości i zmiany

 Na Czeskim Ślónsku – Krnov a Opava


Wybroł żech sie na rajza autym, zwiydzić trocha Ślónka Opolskigo i Czeskigo. Pogoda była piykno, słóńce świyciły i grzoło, tóż po obiedzie ruszół żech z Rybnika w stróna Raciborza, a dalij bez Pietrowice Wielkie, Kietrz, Nowa Cerekwia, do Branic, kaj je granica polsko-czesko. We Branicach zatrzimoł żech sie przi kościele. Pozaglóndoł żech trocha na kościół, na stary kerchów, abo raczyj jego resztki, bo zostało tam pora grobów, na szpital kole kościoła, pocykoł żech pora fotek. Kole kościoła stoły drzewianne krziże z drógi krziżowej i miały przibite cwekami kartki.. Nie wiym po co, bo kónsek dali j były stacyje drógi krziżowej. Po postoju w Branicy trza było jechać dalij, bo czas uciekoł, a jo bół dopiyro na poczóntku drógi. Teraz ruszół żech ku granicy i dalij do miasta Krnov,(polski Karniów), jakiś możno 10 km od Branic. W Karniowie je przejści graniczne Karniów – Pietrowice. Z daleka było już widać jakiś hostel na kopecku (kościół na górce), ale jo sie wybroł piyrsze do miasta. Postawiół żech auto na jakimś placu i zaczón żech spacyrować. Miasteczko piykne, zadbane. Było zaroz widac róznica miyndzy tymi naszymi ziymiami,a tymi czeskimi. Doszoł żech roz dwa na rynek i zaroz mi sie ciepła w oczy jakoś kolorowo chałupa. Poczytoł żech, że to je ratusz. Naprowda piykny. Inkszym chałupóm tyż nic nie brakowało. Dużo zabytków, kościołów, ale tyż było widać, że coś chałupów je nowych, powojynnych. Trocha żech zaś pocykoł fotków, pozaglóndoł do koćiołów, kupiół żech se zmarzlina (lody) i zaś trza było pomału sie wracać ku aucie. Cały czas mi chodziło po głowie zajechać na ta górka ku tymu kościołowi, ale nie wiedzioł żech jako tam trefić, a piechty mi sie nie uśmiychało tam wlazować. Przejechoł żech tam a nazod, ale drógi zech nie zejrzół, tóż żech stanół na tankszteli i sie pytóm, jako dojechać ku tymu hostelu na kopcu. Zaczli mi tłómaczyć, ale wiela żech z tego nie zrozumioł, yno tela w kero stróna móm jechać, tóż zaś żech pojechoł kónsek i sie pytóm. W kóńcu udało mi sie tam dojechać. Ale było to wert. Na wiyrchu (bezmałą nazywo się ta górka Cvilit) stoji ogrómny kościoł, a kónsek dali wieża, co idzie na nia wylyź i se pooglóndać z wiyrchu trocha Czechy. Kosztowało mie te oglóndani 20 Kc za bilet, ale trudno. Połaziół żech trocha po lesie na tej górce i trza było sie brać nazod, bo robiło sie nieskoro, a jo chcioł jeszcze wlyź po dródze do Opavy. Rynek we Opavie mie trocha trozczarowoł. Z jednej stróny stare zabytkowe kościoły, muzea, a kole nich jakiś kómunistyczne blaszoki, jakiś jejich „Społem”. Do tego na rynku stoji pełno drzewianych chałupek, chyba jakiś jarmark tam bół, abo bydzie, bo pełno autów z TV Ostrava tam tyż było. Ludzi nie było za wiela, chocioż po dródze spotykało się całe rodziny na kołach. O drógach nie byda pisoł, bo szkoda czasu. Niby dróga Racibórz – Opava wyglóndo podobnie, ale po czeskij strónie po jednym pasie, a na boku za linióm meter asfaltowego pobocza. U nas za tóm bocznóm kryskóm rant,abo strómy 10cm dali. Dziur żech pora widzioł w Czechach, tóż styknie na tyn tymat. Po dródze z Opavy na Racibórz zatrzimoł zech sie jeszcze przed graniców w Sudicach, kaj stoł ruski czołg, i pómnik na cześć wyzwolicieli. Potym już prosto pojechoł żech do Rybnika.


Na kóniec: jakby keryś mioł czas i chynć, to możecie sie wybrać do tego Krnova. Piykne miasto, małe, ciche, fajno górka pod miastym, kaj idzie pospacyrować do tego kościoła i na wieża. I ni ma to wcale tak daleko. Idzie tyż odbić do Bruntala, ale to już inkszy roz.


Fojerman

 
Copyright (c)2009-2024 {Stanisław Neblik - Fojerman}