Napisoł żech taki tekst do zabawy, coby kożdy z Was móg sie pochwolić znajómościóm ślónskich słówek. Z tekstu na dole trza wypisać śłónski słówka i napisać co óne znaczóm. Słówek tych trza szukać na dwa sposoby:
1. znojść inksze znaczyni słowa użytego w tekście, np. BAL w tekście użyty, jako bal silwestrowy
BAL - piłka
2. poszukać słówka z czynści słów użytych w tekście. Słówka te muszóm być w tekście kole siebie i nie idzie dodować, ani skryślać żodnej literki.
np. móGLI ZDAć
glizda - dźdżownica.
Dlo tych, co nie bydóm pewni swojich odpowiedzi SAM dóm nieskorzi swoja lista ze ślónskimi słowkami w tekście. Byda tyż czekoł na Wasze uwagi i dalsze słówka, na kere jo nie doł pozór.
Amerykón w Lóndynie
Wybroł sie jedyn Amerykón do Lóndynu na Silwestra. Co prowda nie chcioł odwiydzać królowej, ani na trón jeji nie czychoł, yno chcioł udać trocha zielónego pinióndza i zwiydzić Stary Kóntynynt. Ojgyn sie chłop nazywoł i piyrszy roz sie wybroł w tako trasa, tóż zaroz w lóndyńskim cugu mina mu zrzedła, kej usłyszoł cyna biletu:
- 10 fóntów
- Wiela? Dyć u nas za 3 cynty bych zajechoł.
Baniorz nie chcioł sie z nim patyczkować i zaczón ostro:
- Kaj mosz bilet? Abo płacisz, abo wysiodej.
Staro widzi, co sie dzieje, tóż wkroczyła do akcje:
- Boroku, co robisz? Dyć cie wyciepnóm z tego cuga, abo zawrzóm do heresztu.
Trocha sie chlop opamiyntoł, tóż zapłaciół i jechoł dali
- Wybocz, ale je żech piyrszy roz w cołkiym inkszym świecie i nie umia sie sam w tym pochytać, tóż ni ma co robić z tego wielkigo halo.
W Lóndynie zaprosiół chłop swoja Staro do pubu., Prowda pedzieć, to ónymu już kiszki tyż marsza grały i na piwo mioł szmak. Kupili se po 10 deka kebabu, bo te cyny ich przerażały
Po obiedzie wybrali sie na miasto, polotać po sklepach i co kupić. Baba zaroz rozglóndo sie za szmatami. Majóm iś na bal, a przeca óna ni mo se co oblyc, tóż kery babie dogodzi.
Chłop woloł kupić jako petarda, abo raketa do strzylanio we Silwestra. Wybroł se już nawet jedna, ale óna miała metka radziecko i jakiś te lónty krótki, tyn warkocz, kaj sie podpolo, tóż mioł strach, że mu pazury pourywo przi tymu.
Po przijeździe nazod do Ameryki nareszcie mógli se dychnyć i mógli zdać relacjo ze swojich przigód. Ojgónów przociel, Antek padoł mu:
- Chłopie, tyś powiniyn opisać te swoji przeżycia, na pewno dostoł byś Oskara za scynariusz do filmu.